هیچ قلبیده قلبیمده اولان غلغه یوخدی

بیر چاره منِ‌زار و پریشان دله یوخدی

روحیم ایله جسمیمدن ایدوب ترک علاقه

گویا که داخی میل بو آب و گِله یوخدی

دوتقون گویولی گلشن آچار گللر آچاندا

بُلمم ندی گلزاریده میلیم گُله یوخدی

یاریم ایله کاشانه ده منزل ایلیوبدی

هیچ فکر و خیالین یولی اول منزله یوخدی

بیر یوسف گمگشته نین آواره سیم من

کاشانه ی صبریم تالانوب حوصله یوخدی

بیر دامه سالوب سلسله ی زلف کمالی

عالمده ایله دامه سالان سلسله یوخدی

بیر یار سفر کرده گرفتاریم آخِر

دردیم اودی اوندان صورا بیر مسئله یوخدی

آخِر نه قدر من سوروشوم قافله لردن

آیا نه خبر واردی دیسونلر هله یوخدی

بیر عمریدی حسرت گوزومی یولّارا تیکدیم

هر قافله گیچدی او اولان قافله یوخدی

عاشق اولاسان یاره الون چاتمیه هرگز

عاشق لره موندان دا چتین مرحله یوخدی

امّا بو گلایه اوزوموزدن گرک اولسون

یوخسا او گوزل صاحبیمیزدن گِله یوخدی

یاریله عمللر آرادا فاصله سالموش

یوخسا آرامیزدا ایله بیر فاصله یوخدی

نیلوم؟ عملیم اولماسادا عاشقیم من

بو عشقیده آرامشیم افکاریله یوخدی

عالمده گنهکار مگر عاشق اولانماز

بو باره ده که جای مذمّت دله یوخدی

بیز هیچ آناوین خاطرینه گَل بیزه باش چک

زهرا آدی گَلسه داخی بیر مسئله یوخدی

گَل سودامرین قانینی آل خسته ربابین

تابیله توانی بو قدر نسگله یوخدی

"زرّین قلم" عاجزدی گوزل یازماقا امّا

بو مسئله لر "عابدیله" "خوندله" یوخدی